照顧小朋友唔係易事，所以有一仔一女的港姐冠軍楊婉儀 ，為全力湊仔，去年辭去慧妍雅集執行委員會會長職務兼暫停拍劇，務求做個全職好媽媽。日前下午，楊婉儀一家四口到中區Shopping，小朋友精力旺盛四圍走，貴為港姐冠軍的媽媽無話聲嘶力竭喝停仔女，反而用相機拍低仔女的活潑舉動，甚至任由他們在店舖中左摸右摷，這種自由式教法絕對恨死香港大部份小朋友。採訪︰張詠森
當日，楊婉儀老公王瑞勳負責替仔女揀選衣服，而媽媽則負責看管囡囡Hannah及囝囝Jonah，兩位小朋友好似唔識咁四圍走，衝完左面再衝向右面，究竟走走去有幾好玩？只有當事人至清楚。
教仔別具一格
對於仔女的失控行徑，楊婉儀已見慣不怪，還即刻拎相機出為仔女拍低此歡樂時光。之後，再同小朋友入童裝店找爸爸，由於店內有兩個BB公仔陳列品，因而再次刺激兩位小朋友的腦電波，動作一致地對公仔起勢摸，難得楊婉儀唔出聲，靜待仔女玩厭離開。
|
