Gigi成一日民主女神 貼趙連海消息 被迫刪文

瘋癲快樂人

【明報專訊】Emily噚日上上吓網，發現歌手梁詠琪    （Gigi）突然畀網友封做「民主女神」，究竟此話何解？原來網上流傳Gigi噚日喺自己新浪網微博上，轉載咗蘋果日報    有關「結石寶寶之父」趙連海受審嘅消息，但後來懷疑畀新浪網施壓，最後要搞到刪文。

「內地有內地規矩……好，我删！」

Emily第一時間上咗Gigi個新浪微博睇，見到佢有句留言話﹕「內地有內地的規矩……好，我删！但不公平的事還是不想再看到……尤其發生在平民百姓身上」！就係呢個舉動，搞到網友留言大讚Gigi有「吉士」，有人仲話「看到一個不一樣的梁詠琪」，仲鬧逼佢刪除轉載做法「可恥」 ！

指唔係因政治壓力刪文

突然間畀人封做「民主女神」，Emily當然要向Gigi求證吓，點知佢就講咗另一個版本。佢話自己轉載咗趙連海報道後，有歌迷留言話追睇佢個微博，係想知道佢嘅最新動向，而唔係睇佢轉貼新聞，所以Gigi先至「從善如流」刪文，絕對唔係因為政治壓力。

至於嗰句「內地有內地規矩」又點解釋，Gigi話係指班內地歌迷喎！咁都得？3歲細路哥都唔會信，查實成件事Gigi都係受害人，唔使咁驚青喎！
.