華仔投資 拳拳到肉 打到七彩 陳觀泰梁小龍臨老出「股」惑
(星島日報 報道)陳觀泰與梁小龍於新片《打擂台》孭飛演出，戲中除了「拳拳到肉」戲分外，2人又透露難得有人敢起用他們這些老將做主角，所以豁出去於片中出「股」惑引觀眾入場！文、圖︰康蕎
由劉德華 投資、林家棟監製新片《打擂台》起用陳觀泰、梁小龍及陳惠敏幾位前輩級人馬擔演，戲中這班老將正如《葉問2》的洪金寶打到「拳拳到肉」，即使步入花甲之年仍是衝勁十足，寶刀未老！
問到現實生活中是否同樣好打？陳觀泰就謙稱︰「近年練習少，血液循環冇以前咁好囉！(戲中見你好好打？)其實部戲係講寫實，幾好打都好，人始終會老變到『有心無力』，呢個係一個必經階段！」陳觀泰又自爆難得有人肯投資及起用他們幾位老將擔演，故此豁出去於片中有背部全裸鏡頭，笑問到事前可有鍛煉「股肌」？他就大賣關子叫大家買票入場自己睇！
用拳頭抱不平
至於梁小龍訪問當日就因為早前與羅家英 合拍《龍鳳店》時被對方不慎誤傷盆骨要用柺杖代步，對此，他笑說︰「輸咗畀個弱者羅家英！真打佢一定唔夠我打！」而問到梁小龍現實中會否用拳頭解決問題？他說︰「會！我打交係有理由，見到人打劫、打女人、打老人家我一定出手！」至於戲中他可有份「露股」演出？他就笑說︰「有場會有成班人除晒衫背向鏡頭，到時你們自己估邊個打邊個囉！」
另外，戲中飾演陳觀泰與梁小龍兩位好打之人師傅的泰迪羅賓透露，現實生活中與陳觀泰其實是同門師兄弟，作為師弟自認不夠師兄打，但就笑言後生時亦曾經打遍球場無敵手︰「細細個係人都鍾意打交，最常發生於球場，當年打爛仔交實贏！」
|
