基出位古明華 6萬網友撐攞最佳男配角
無綫劇《巴不得媽媽…》令女主角之一的岑麗香迅速上位，劇中飾演蘇基的綠葉古明華也備受追捧，網友愛他基味濃而不核突，網友遂發起「一人一like撐蘇基攞獎」行動，支持他挑戰今年台慶最佳男配角或飛躍進步男藝員獎，截至昨日已獲近6萬名網友like。其實古明華早在網友心中已是響噹噹的人物，他94年在周星馳電影《國產凌凌漆》中演的公安阿頭，亂槍掃射喊得極度樣衰的梁思浩、鄧兆尊，大快人心而被網友勁讚。古明華在無綫劇《巴不得媽媽…》飾演乸型蘇基，基味濃得來夠搞笑又不核突。
前晚一集古明華與養母蘇恩磁的母子情亦甚感動，網友遂發起「一人一like撐蘇基攞獎」行動，支持古明華爭今年飛躍進步男藝員獎或最佳男配角，截至昨日已獲近6萬網友like。
「第一次咁多人撐」
古明華昨接受電話訪問，被問到網友支持他角逐獎項時謙虛地說：「好開心，估唔到反應咁大，但開心之餘其實睇番仲有好多不足嘅地方，希望觀眾睇清楚啲有好多做得唔好，但點都多謝佢哋，第一次咁多人撐我，有少少迷惘，多謝佢哋支持我，未來會更加努力答謝佢哋。」
問到是否想攞獎？古明華說：「呢個好被動，公司政策，啲獎畀邊個，大家會明白，咁多人支持當然希望攞，但除努力做好工作外，冇乜嘢做到，好被動。」
學院派曾逐金像獎
人稱古佬的古明華不但是實力派，更是學院派，90年在香港演藝學院畢業，曾是香港話劇團成員，93年以電影《旺角馬場》角逐第十二屆香港電影金像獎最佳新人，對手有袁詠儀、朱茵和鄭秀文等，但最終敗給袁詠儀。古明華亦是配音員，曾為賣座動畫《反斗奇兵》系列聲演士兵隊長。
[align=center][attach]7263[/attach][/align]
頁:
[1]